Thursday, July 9, 2020

चांदणी

आकाशातली चांदणी उगाचच लुकलुकते
प्रभेने आपल्या ती इतरांचे लक्ष वेधून घेते
पृथ्वीच्या आकर्षणाने ती ओढली जाते
आणि त्यातच ती भस्मसात होऊन जाते ...
- सागर 

Friday, May 12, 2017

पहिल्या पावसाच्या जलधारांचा शिडकावा

बेभान वारा
ग्रीष्माच्या झळांना
विस्कटून टाकतो

वसुंधरेच्या पोटात
उष्णतेचे काहूर
थैमान घालते

आसमंत सारा
अनामिक तलखीने
कासावीस होतो

तेव्हाच...

ढगांत लपलेला
पाऊस करतो
तप्त मनांवर
पहिल्या पावसाच्या
शीतल जलधारांचा
शिडकावा....

- सागर

Thursday, May 11, 2017

झेप घे मानवा....

पहाटेच्या निवांत वेळी
उडणार्या पक्ष्यांनो
सकाळच्या निरागस वातावरणाचे
भान तुम्ही दिले...

निरव शांततेच्या काळी
सावरणार्या मनांनो
आयुष्याच्या कठीण अश्वमेधांचे
शिरकाण तुम्ही केले...

वादळी पावसाच्या आभाळी
कोसळणार्या विजांनो
उभारी घेण्याच्या सामर्थ्याचे
अर्घ्य तुम्ही दिले...

झेप घे मानवा.... झेप घे ...
-सागर

Tuesday, January 13, 2015

प्रेम हे असं का असतं?

प्रेम हे असं का असतं?
कोणीतरी उस्फूर्तपणे प्रेम करतं
त्यात वाहवून जावंसं वाटतं
पण तसं प्रेम का फसतं?

कोणीतरी मनात आरपार रुतत असतं
तिच्याबरोबर प्रेम करता येत नसतं
तरीसुद्धा मनाला तिचंच प्रेम हवं असतं
पण मन बेईमान होण्यास तयार नसतं



सागरात सरितेला लुप्त व्हायचं असतं
तिला एकजीव होऊन जायचं असतं
पण सागरास प्रेमरसात न्हायचं असतं
खारट चव सावरत जगायचं असतं

 
- सागर

Monday, May 12, 2014

प्रत्येक क्षण

जगायचा प्रत्येक क्षण असा
की निराशेला हेवा वाटावा ...
निराशेचा क्षण आला तसा
की उचलून लगेच फेकावा ....


- सागर

Friday, May 9, 2014

काळजात ती रुतली

सकाळी चूळ भरली
एक अप्सरा दिसली
अन् कट्यार घुसली
काळजात ती रुतली
- सागर

Wednesday, November 6, 2013

मृत्यू...

मृत्यू...
सर्वांच्या मनांत थैमान घालणारा
कुठे शांत तर कुठे रौद्र रुप धारण करणारा
तरीही...
प्रत्येकाला अमरत्वाचे विष पाजणारा
कधी नकळत उचलून नेणारा
तर कधी हिंस्त्र वेदना देणारा
मलाही... तो हवाय 
एका अज्ञात विश्वात नेणारा...
थंड नि बोचर्‍या स्पर्शाने कापवणारा
तसाच जाळणार्‍या उष्म्याने हादरवणारा
हिंस्त्र श्वापदाच्या तोंडाने लचके तोडणारा
एकमेवाद्वितिय तो...
मृत्यू...!!!

- सागर

Monday, July 29, 2013

झालो मी दंग

देवाच्या दारी आता रंगला अभंग
आज माझ्या काळजाचा झाला रसभंग
राजाची राणी तेव्हा आली नाही संग
लग्न लागले तिचे नि झालो मी दंग
- सागर

Thursday, June 20, 2013

व्यथित आज झालो

कधी नव्हे ते व्यथित आज झालो
तुझ्या एका अनपेक्षित आघातानं
दुसर्‍यांचे सर्व सहन करत आलो 
कोसळलो मात्र आजच्या घावानं

विरंगुळ्याच्या क्षणांत गुरफटलो जरा
शिक्षा अशा चुकीसाठी की जी झालीच नाही?
मूर्खपणाच सगळा झाला खरा
पण का मला समजावता आला नाही?

प्रेमात भीती नसावी कधीही 
पण आज मी भ्यालो आहे
आक्रंदत आहे मन तरीही
मी मात्र नि:शब्द झालो आहे

-सागर

Thursday, June 13, 2013

आठवणींत तू

आनंद गोठला मनात माझ्या
जशा गुलाबाच्या पाकळ्या
आठवणींत तू  आजही माझ्या
प्रत्येक श्वासात मोकळ्या
- सागर